You are here
Kate Engkong 

Di Kandang Kambing Ngembik, di Kandang Kebo Ngelenguh

Di kolong dipan ade uler sanca. Lagi asyik ngemil pete. Salam kenal wahai pembaca. Nih, aye si tukang cerite. Ngomong-ngomong soal tukang, di Jakarta entu paling banyak deh. Ade tukang bakso, tukang bubur, tukang sampah, tukang ojek, tukang insinyur dan tukang-tukang yang laennye. Nah kalo aye mah cuman tukang cerite. Modalnye cuman berani ngebacot di depan orang-orang yang kalo kate anak muda sekarang suka ngegalau dan butuh hiburan. Padahal sih koleksi cerita aye enggak banyak-banyak banget. Lah pan cerite yang aye punya cuman soal Engkong Mawi doangan.

Kong Mawi atawa nama lengkapnye Asmawi eni orang Betawi aseli yang udah banyak makan garam. Tenang pembaca, die enggak bakalan kena darah tinggi kok. Makan garam di sini maksudnye udah banyak pengalaman gitu. Lah pan die udah idup dari zaman Belande ngegarot kekayaan alam kite dulu.

Suatu malam nih pembaca, Udin — cucunye Kong Mawi — baru aje nyampe rumah dengan muke yang rade dongkol. Die masuk rumah sambil ngedumel enggak jelas. Engkong Mawi yang ngeliat tingkeh aneh cucunye entu langsung aje manggil, “Din, mari lu!”

Die samperin engkongnye yang lagi ngopi di dipan. Duduk merengut di depan Kong Mawi. “Nape lu tong? Tuh muke cembetut aje.”

“Nggak ape-ape Kong. Cuman sebel aje,” jawab Udin.

“Sebel kenape lu, Din?”

“Entu Kong. Tadi kan Udin ngapel ke rumah pacar di udik sono. Terus pas Udin lagi indehoy bedua di depan rumah, tiba-tiba aje Pak Lurah ama Hansip dateng. Udin disuruh pulang Kong. Diusir. Kate Pak Lurah, ‘Sekarang udah malam. Lu mau pulang apa gue arak keliling kampung.’ Pan itu juga baru jam sepuluh Kong.”

Engkong cuman ngakak denger cerite Udin. “Din, masih untung lu nggak diarak keliling kampung. Inget Din, di sono pan bukan kampung lu. Jangan lu samain ama di mari yang jam dua belas malem masih banyak anak mude yang nongkrong sambil gitaran. Inget Din, di kandang kambing ngembik, di kandang kebo ngelenguh.”

Udin cumanan ngangguk-ngangguk denger kate-kate engkongnye. Die nyadar kalo adat di tiap kampung beda-beda. Mangkanye, die ampir aje diarak keliling kampung. Untung aje Pak Lurah masih bae ati ama die.

“Din, entu peribase bukan cuman buat berkelakuan. Tapi bise juga dipake buat yang laen.”

“Maksud Engkong?”

“Buat dagang misalnye. Entu peribase juga bisa dipake. Jadi, sebelon elu dagang di suatu tempat lu kudu tau kebiasaan ama adat di tempat entu. Jangan sampe lu buntung. Bayangin nih, apa iye lu bakalan untung kalo jual makanan yang rasenye pedes banget di daerah yang lideh orang-orangnye enggak bise makan makanan pedes. Pan elu kudu nyesuain tuh makanan lu ama lideh mereka biar dagangan lu laku. Iye nggak?

Udin cuman manggut-manggut kayak burung beo. Sedang Kong Mawi mesem-mesem liat cucunye yang semester akhir dan lagi bikin skripsi entu dapet ilmu baru dari engkongnye sendiri. Ibarat kate nih pembaca, guru yang paling baik entu ya pengalaman. Biar dikate Kong Mawi cuman sempet nyicip bangku SR (Sekolah Rakyat, kalo sekarang sama kayak SD), entu pun nggak kelar, tapi kan kalo soal pengalaman idup pan die lebih banyak dari si Udin.

Balik ke soal peribahase di kandang kambing ngembik di kandang kebo ngelenguh, ternyate orang-orang asing malah udah pade jago nerapinnye. Sebelon mereka bikin usahe di suatu negare ato kota, biasanye mereka bikin penelitian tentang budaye di tempat entu dulu. Aye sempet kenal tiga orang Korea yang belajar bahasa dan budaye Indonesia di kampus tempat temen aye ngajar. Mereka tuh sengaja belajar entu buat tau budaye di negeri kite nih kayak ape. Terus usaha ape yang cocok di sini. Bahkan kate temen aye entu, begitu kelar mereka tuh pade keliling nusantara buat ngenalin seperti ape masyarakat dan budaya kite.

Sekarang gini deh pembaca, kalo aye kebanyakan ngebacot entar dianggap sok jago lagi. Mending balik deh ke diri kite masing-masing. Mao enggak kite nerapin dan ngegali nilai-nilai filosofis dari budaye leluhur kite. Kalo kurang asin digaremin. Keasinan diomelin babeh. Bukan maksud aye ngeguruin. Tapi cuman berbagi kiseh…

 

Tabe…

Mh Hamdan

Related Posts Plugin for WordPress, Blogger...

Related posts

Leave a Comment