Jodoh dan Duduk Depan Pintu

Kalo puase jangan makan pete. Mulut bau ditinggal kekasih. Eh pembaca yang tercinte. Si tukang cerite nongol lagi nih. Ketemu lagi nih ama aye. Kali eni aye mau cerita soal jodoh. Nah, buat yang masih belon dapet jodoh, boleh deh mampir ke mari. Kali aje ade jodohnye. Ngomong-ngomong, aye juga lagi nyari jodoh nih. Ade enggak ye gadis berkerudung yang mau ama aye…hehe…

Kok jadi ngelantur ye. Balik ke cerite lagi deh. Eni masih soal Kong Mawi, tapi bukan mau nyariin jodoh buat Kong Mawi loh. Biar pegimane Kong Mawi masih cinte ama almarhumah bininye. Enggak bakalan die nikeh lagi. Lagian gadis mane yang mau ama orang setua die. Lebih tepatnye eni soal Kong Mawi ama Aiseh, cucunye yang paling botoh. Nah, pembace si Aiseh belon ade jodoh nih. Minat? Kalo minat coba deh adepin dulu tuh si Engkong. Biar kate udeh tua, tapi soal maen pukul die masih jago.

Kalo kate hikayat nih, pada suatu ketika Kong Mawi lagi asyik ngopi di teras rumah. Masih ngepul tuh gahwe. Baru aje dianter Fatimah, anaknye yang bontot. Enggak jauh dari tempat Kong Mawi leha-leha nikmatin minggu pagi, Aiseh lagi asyik maenan bebe alias blackberry di depan pintu. Mesem-mesem enggak jelas. Sontak aje Kong Mawi ngomong, “Duh Aiseh, cucu engkong yang caem, enggak baek duduk di depan pintu gitu. Mending sini temenin engkong ngopi.”

“Ogah ah Kong. Udah pewe di sini…” kate Aiseh cuek.

“Pewe, apaan tuh?”

“Ya, Engkong nggak gaul nih. Itu artinye ‘posisi weeeennnnak’. Udah betah di sini gitu maksudnye, Kong.”

“Aiseh… Aiseh… Ade-ade aje,” kate Kong Mawi sambil geleng-geleng.

Lagi asyik-asyiknye mereka berbicara, Fatimah – emaknye Aiseh – keluar bawa sepiring roti sumbu. Di depan pintu die kesandung kaki Aiseh yang melintang. Ampir aje die jatoh. Untung keseimbangannye lumayan bagus. Kesel, Fatimah pun ngomel ke anaknye, “Aiseh…. Aiseh…. Ngapain ngejogrok depan pintu gitu.”

“Ah Emak. Emang ngape sih?”

“Dasar anak sekarang enggak ngerti adat. Seh, pamali tau duduk depan pintu. Kate orang-orang dulu suseh jodoh kalo duduk depan pintu. Paham nggak Seh?”

Aiseh cembetut diomelin enyaknye. “Emak nih. Entu kan kate orang-orang dulu, Mak. Kalo kate orang-orang sekarang mah nggak ade hubungannye jodoh ma duduk. Duduk mah duduk. Jodoh ye jodoh. Nggak ade hubungannye Mak.”

“Suseh ngomong ama anak sekarang. Dibilangin orang tue ngejawab aje,” Fatimah ngedumel sambil masuk rumah ninggalin anaknye yang masih nongkrong di depan pintu. Kong Mawi yang dari tadi ngeliatin emak-anak pade ribut cuman mesem-mesem aje. Pelan die berkate ama cucunye, “Aiseh, sini duduk deket Engkong!”

Aiseh cuman ngelirik sebentar. Terus lanjut ber-bbm-an ria entah ama siape. “Sini!” Perintah Kong Mawi dengan sedikit naekin suaranya. “Engkong mau ngomong sebentar. Tang-ting tang-tingan ama hapenye ditunda bentar ye. Bisakan? Bentaran aje…!”

Dengan males Aiseh bangun. Nyamperin Engkongnye. Lalu duduk di samping Kong Mawi, “Emang Engkong mau ngomong ape?”

Kong Mawi nyeruput kopinye sejenak. Lalu die mulaiin omongan ama cucunye yang botoh entu. “Omongan Emak lu itu enggak semuanye salah…”

“Masa cuman duduk depan pintu doang susah jodoh sih, Kong?” Aiseh memotong perkataan Kong Mawi. “Tuh kan. Engkong belonan selesai ngomong udah dipotong. Dengerin dulu omongan Engkong ampe selesai. Baru deh Aiseh komentar.”

“Iye Kong. Aiseh dengerin deh.”

Kong Mawi pun senyum. Seneng ama pengertian cucunye. “Maksud Engkong begini, Seh. Omongan Fatimah itu enggak semuanye salah. Itu cuman omongan orang jaman dulu. Lu jangan ngeliatnye cuman dari wujud kate-katenye. Tapi, ape maksud dari entu omongan.”

“Maksud Engkong?”

“Gini ye Aiseh cucu Engkong yang botoh… Emang enggak ade hubungannye duduk depan pintu ama jodoh. Tapi lu liat kan tadi emak lu ampir jatoh gara-gara kesandung kaki lu. Paham kan lu, Seh?”

“Paham apenye Kong?”

“Aduh, Aiseh… Aiseh…” sambil geleng-geleng kepala. “Kalo elu di depan pintu pan ngalangin jalan orang yang masuk. Nah, entu maksudnye suseh jodoh. Gimane ada laki mau jadi jodoh lu kalo mau masuk rumah aje udah dihalangin. Iye ga?”

Aiseh cuman bisa mesem-mesem. Bener juga pendapat engkongnye. Nah, pembaca yang budiman. Jangan salah sangke dulu ye ama ungkapan-ungkapan orang dulu atawa kite lebih sering ngenalnye dengan ‘pamali’. Sebab kite juga kudu ngerti dulu maksud yang ade di belakangnye bukan ape yang kite denger begitu aje. Sebenernye engkong-engkong kite dulu entu pandai loh maenin istilah atawa ungkapan. Ampe di sini dulu aje deh penjelasannye. Entar kalo mangkin panjang malah mangkin bingung lagi. Akhir kate, ke perempatan makan bubur, biar pedes pake sambel pete, semoga pembace pade kehibur, sampe jumpa di laen cerite.

 

Tabe…

Mh Hamdan