Magrib-magrib Beli Terasi

Nasi uduk sambel pete

makannye di Romawi

Aye nongol bawa cerite

soal terasi di rumah Kong Mawi

 

Udah lama nih aye enggak nyapa pembaca semua. Maklum deh, idup di Jakarta emang keras. Buat sepiring nasi aje kite kudu seharian di kantor. Belonan pas pulangnye kite kudu sabar ngadepin macet yang bisa berjam-jam. Jadi, baru sekarang eni deh aye sempet berkiseh lagi. Dan masih sual Engkong Mawi ama keluarganye. Sekali ini rumah Kong Mawi rame cuman gare-gare terasi. Mari deh kite simak ceritanye.

Azan magrib baru aje meraung di sekitar Kampung Mencos. Ngingetin warga buat sebentar lupain dunie. Mampir deh ke langgar dan gelar sejadah. Menghadap sang pencipta diri kite. Di rumah, Kong Mawi baru aje ambil wudhu dan bersiap mau ke musolah. Tapi, sekonyong-konyong die denger ribut-ribut dari dapur. Penasaran. Kong Mawi pun ke dapur. Diliatnye, emak beranak yang lagi masak buat makan tiba-tiba aje rame sendiri.

“Timah, Ida, ngape lu magrib-magrib pada ribut?”

Fatimah dan Ida diem begitu mereka ngeliat Kong Mawi nongol di dapur. “Itu Kong, kan Emak bikin sayur asem. Pan lebih sedep tuh kalo pake sambel terasi. Tapi, pas Ida mau mau bikin eh terasinye abis. Terus Ida mau beli ke warung, eh emak malah ngomel. Emak bilang…”

“Bukan ngomel, Be,” Fatimah motong omongan anak perempuanye. “Timah, cuman ngingetin ke Ida kalo magrib-magrib entu enggak bae beli terasi entar diikutin setan. Pan bau terasi tuh nyengat banget. Bisa ngundang setan.”

“Ah, emak mah kolot,” Ida ngegerundel.

“Ida, enggak boleh gitu ama orang tua. Enggak bae ngegerundelin emak lu,” nasihat Kong Mawi. Ida cuman diem. Nekuk mukanye. Sedang, Fatimah kayak dapet angin. Dibelain babenye.

“Ida, Emak lu itu nggak salah, tapi juga nggak bener.”

“Loh kok.” Ida bingung ama perkataan Engkongnye. “Maksud Engkong gimane?”

“Begini Da, nyang diomongin Timah itu omongan orang dulu. Setiap omongan orang dulu jangan elu ambil mentah-mentah. Pasti ada maksud dibalik omongan itu.”

“Maksudnya, Be?” sekarang Fatimah ikut penasaran.

“Beli terasi magrib-magrib entu sebenernye enggak bakalan diikutin setan. Sebenernye ada maksud dari omongan entu. Elu pan tau Mah, kalo magrib itu waktunye bentaran doang. Nah kalo elu beli terasi ke warung kan makan waktu. Zaman dulu juga pan warung masih susah dan jauh-jauh juga. Jadi kalo pake ke warung bisa enggak magriban pan. Jadi, maksud itu pamali biar pas magrib itu kita duluin deh solatnye baru kerjaan dunia.”

Fatimah dan Ida manggut-manggut kayak beo dengerin penjelasan Kong Mawi. “Udah berenti dulu deh masaknye bentaran. Solat dulu sono. Abis entu baru deh lu beli terasi, Da. Pan kurang sedep juga makan sayur asem enggak pake sambel terasi. Engkong ke langgar dulu ye.”

“Iye Kong. Entar abis solat Ida bikinin deh sambel terasi kesukaan Engkong.” Kate Ida mantap setelah mendapat hikmah dari penjelasan engkongnye.

Nah, demikialah pembaca yang budiman. Ternyata terasi bisa bikin rumah Kong Mawi rame. Juga bisa dimanfaatin ama engkong-nyai kite di zaman dulu buat ngungkapin sesuatu larangan dengan bahasa kiasan. Jadi, sebenernye leluhur kite dulu itu pinter-pinter, kitenye aje sekarang yang males ngulik di balik sesuatu yang diungkapin leluhur kite. Mangkenye deh, sebagai generasi muda kite kudu ngegali nilai-nilai kearifan lokal kite sendiri.

Udahan dulu ye pembaca. Lain waktu kite lanjutin lagi cerite Kong Mawi ama keluarganye. Semoga ada hikmah yang bisa kite ambil dari cerita kecil ini. Tabe…

Mencos, 26 Maret 2014

Bang Hamdan